3.7萬元逾期未還 海航陳峰傳做「老賴」

文章日期:2020年9月17日

【明報專訊】內地有一種稱呼叫「老賴」,專指一啲唔服從法庭裁決,欠錢唔還嘅企業或個人。噚日內地傳媒《北京商報》就發現,海航集團因為一宗合約糾紛,被法庭裁決要償還原告3.7萬元人民幣款項,但因為海航未依還款,結果集團同董事長陳峰被列入「老賴名單」。

作為官方認證嘅「老賴」,當然唔止得個名咁簡單,根據規定,陳峰將會被限制消費,直接啲講就係一日係老賴,一日都唔可以坐飛機同高鐵,坐火車或者搭船之類唔可以買頭等,除非工作或生活必需,否則唔可以住星級賓館、冇得去夜總會飲酒作樂,想去打高爾夫?諗都唔好諗。如果違規就可能要被判罰款甚至係拘留。堂堂海航集團一把手冇得坐飛機都咪話唔諷刺,不過小琴更在意係,雖然海航近年財政吃緊,但唔會嚴重到連三幾萬都拎唔出啩。

email:piano@mingpao.com

[小琴密語]