團結基金廣告累事 希瑪出通告護董事

文章日期:2020年9月3日

【明報專訊】本港眼科醫生李佑榮上個月初被醫委會譴責專業失德,佢師父兼老闆林順潮創辦嘅希瑪眼科(3309)噚日出通告力保,話事件唔涉及欺詐或誠信問題,亦唔影響公司,李佑榮繼續適合擔任執董同埋喺公司執業。事件有乜因由?原來係因為團結香港基金。話說2018年團結基金請佢做演講嘉賓,但又冇話畀佢知會落廣告,又冇問清楚佢正確職銜,就喺廣告度稱呼佢做「視網膜和黃斑點手術專家」,結果搞到李佑榮因為涉嫌「未有採取合適措施避免有關名稱被引用」,被控專業失德。

據李佑榮當日出席醫委會聆訊時講番,佢一望份廣告「見到就知死梗喇」。雖然成件事係團結基金冇了解清楚,但李佑榮都有一定責任,正如聆訊小組主席蔡堅質疑,其實佢事後可以要求對方矯正,但冇做到。希望李醫生可以汲取教訓啦!

[小琴密語]